“Moskva Rusiyada saxlanılan ukraynalı dənizçiləri mübadiləsiz azad etməlidir”. “Qafqazinfo”nun “Korrespondent”ə istinadən verdiyi xəbərə görə, bu bəyanatla Ukrayna Prezidenti Vladimir Zelenski çıxış edib.
Dövlət başçısı həmçinin qeyd edib ki, rəsmi Kiyev eyni zamanda “RİA Novosti-Ukraina” agentliyinin baş redaktoru Kirill Vışinski və ukraynalı rejissor Oleq Sentsovun azadlığa  buraxılmasına hazırdır:
“Cənab Vişinskiyə münasibətdə - əgər bu, ilk normal addımlardısa, bu cür şərait varsa, o zaman biz hazırıq. Əgər istəyirsinizsə, gəlin biz sizə cənab Vışinskini, sizsə bizə cənab Sentsovu təhvil verin”.
Bundan başqa, o bildirib ki, Ukrayna bütün siyasi məhbusları almaq istəyir və Vişinskinin mübadiləsi bu yolda ilk addım ola bilər.
Xatırladaq ki, 2018-ci il noyabrın 25-də Ukrayna Hərbi Dəniz Qüvvələrinə məxsus 3 gəmi Rusiya sərhədlərini pozması iddiası ilə girov götürülüb.
28 noyabrda Simferopol məhkəməsi saxlanılan 24 ukraynalının hamısı barədə həbs qərarı çıxarıb.

Kirill Vışinski 15 may 2018-ci il tarixində Kiyevdə saxlanılıb. Jurnalistə bildiriblər ki, o, özünü "Donbass Respublikası" adlandıran qurumu dəstəkləməkdə və dövlətə xəyanətdə şübhəli bilinir. Onun ittiham edildiyi maddədə 15 ilədək həbs cəzası nəzərdə tutulur. Xerson şəhər məhkəməsi mayın ‪17-də Vışinski ilə bağlı həbs qərarı çıxarıb. Hazırda jurnalistin həbsi iyulun 22-dək uzadılıb.

Oleq Sentsov 2014-cü ildə Krımın bir neçə şəhərində terror aktı hazırlamaq və həyata keçirmək ittihamı ilə məhkum olunub. Rejissor 20 il müddətinə azadlıqdan məhrum edilib, amma o, bütün ittihamları rədd edir. Bir çox hüquq müdafiəçiləri Sentsovun işini saxtalaşdırılmış və siyasi motivli hesab edir.
 


Paylaş: