Xəbər verdiymiz kimi, "Çiçəklənən Ermənistan" Partiyasının nümayəndə heyəti Moskvaya səfərdən qayıdıb.

29 oktyabrdan Rusiya paytaxtında bir sıra görüşlər keçirən partiyanın nümayəndə heyəti artıq İrəvandadır.

Nümayəndə heyətinin tərkibinə parlamentin vitse-spikeri Vahe Enfiadcan, komitə sədri Mikayl Melkumyan, ana müxalifət sayılan "Çiçəklənən Ermənistan" fraksiyasının sədri Arman Abovyan və deputat Naira Zöhrabyan daxil idi.

"Joxovurd” qəzetinin yazdığına görə, nümayəndə heyəti Moskvada hakim partiya, müxalifət təmsilçiləri ilə görüşlər keçirdiyini bildirsə də, səfərin nəticəsi barədə heç bir məlumat təqdim olunmur. Erməni nümayəndə heyəti ancaq çoxsaylı görüşlər keçirdiyini bildirib.

"Ancaq bu görüşlərin nə qədər effektli olacağından danışmaq hələ tezdir”, - deyə qəzet yazıb.

Nəşr qeyd edib ki, hətta ilk gün nümayəndə heyəti Vladimir Jirinovski ilə şəxsən görüşüb.

Görünən odur ki, erməni nümayəndə heyəti Qarabağla bağlı müzakirələrdə istədiyi nəticəni və dəstəyi almadığına görə bu barədə susmağa üstünlük verir.

Bu gün isə Ermənistanda nəşr olunan "Past" qəzeti yazıb ki, müxalifətdə olan "Çiçəklənən Ermənistan" Partiyasının sədri Qarik Sarukyana bugünlərdə bağlı zərf təqdim olunub. Zərfin Rusiya yüksək siyasi dairələri tərəfindən verildiyi bildirilir. Hələlik nə partiya sədri, nə də nümayəndə heyətinin üzvləri məktubun mətni barədə məlumatı ictimaiyyətə açıqlayıb.


Paylaş: