Azərbaycana qarşı daxildən və xaricdən başladılan kampaniyalar son zamanlar, xüsusilə də koronavirus pandemiyası dövründə daha da geniş vüsət almağa başlayıb.

Bu kampaniyaların kimlər tərəfindən aparıldığı, sifarişlərin hansı dairələrdən gəlməsi ilə bağlı fərqli fikirlər səsləndirilir. İddialarda “beşinci kolon” tezisi daha çox səslənir və bu kampaniyaların məhz bu qüvvələr tərəfindən həyata keçirildiyi deyilir. Belə bir fikir də səslənir ki, Azərbaycanda “beşinci kolon” xarici qüvvələrin dəstəyi ilə fəaliyyət göstərir.

Maraqlıdır, “beşinci kolon” milli təhlükəsizliyə təhdid ola bilərmi?

Cebhe.info-ya açıqlamasında deputat Arzu Nağıyev deyib ki, burada milli və dövlət təhlükəsizliyinə ümumi təhdiddən söhbət getmir:

“Düşünürəm ki, “beşinci kolon” deyəndə, bu gün söhbət təkcə daxili düşmənlərdən getmir. Eyni zamanda, xaricdən bunları idarə etməyə cəhd göstərən bir sıra qüvvələrdən gedir. Hüquq -mühafizə və xüsusi xidmət orqanları Azərbaycanda əməliyyat şəraitinə tam nəzarət etdiklərinə görə bu qüvvələr yalnız müəyyən dolayı yollarla fikir bildirirlər. Lakin “beşinci kolon”un dərinə gedə bilməsi inandırıcı görünmür. Çünki biz demokratik inkişaf istiqamətli bir dövlətdə yaşayırıq. Üstəlik həm də erməni təxribatı ilə mübarizə aparmaqla məşğuluq. Xüsusi xidmət orqanları da “beşinci kolon” kimi müəyyən qüvvələri nəzarətdə saxlamaqla, həmin təxribatın qarşısını almağa qadirdir. Söhbət burada milli və dövlət təhlükəsizliyinə ümumi təhdiddən getmir, onun müəyyən elementlərindən, detallarından gedir. Bunun da qarşısını almaq mümkündür”.


Paylaş: