Çexiya Respublikasında gizli iş aparan kəşfiyyat xidmətləri arasında ən aktiv və təcavüzkar fəaliyyət Rusiya və Çinin xüsusi xidmət orqanları tərəfindən həyata keçirilir. Belə bir nəticə Çexiya Təhlükəsizlik və İnformasiya Xidmətinin (BIS) 2018-ci ilin yekunlarına dair hesabatında yer alıb. Bu barədə “RBC” agentliyi xəbər verir.

"Ölkəmizdə fəaliyyət göstərən bütün kəşfiyyat xidmətlərinin fəaliyyəti ilə bağlı əldə edilən məlumatların təhlili əsasında bir daha təsdiqlənib ki, ən aktiv və eyni zamanda ən aqressiv fəaliyyətlə Rusiya Federasiyası və Çin Xalq Respublikasının xüsusi xidmət orqanları məşğul olur", - sənəddə deyilir.

BIS qeyd edir ki, Rusiya və Çinin kəşfiyyat fəaliyyəti siyasət, diplomatiya, iqtisadiyyat və informasiya müharibələri sahələrini əhatə edir.

“Rusiyanın apardığı əməliyyatlara hibrid xarakter xasdır. Bu əməliyyatlar Rusiyanın təhlükəsizliyinə başlıca hərbi təhdid gördüyü rəqibə - NATO və alyansa üzv ölkələrə, o cümlədən Çexiyaya qarşı yönəlib”, - sənəddə deyilir.

Agentliyin bildirdiyinə görə, Rusiya kəşfiyyatının əsas məqsədi “qarşı tərəfi özünü alçaltmağa təşviq etmək üçün qərar qəbulundan məsul şəxsləri və qərar qəbulu prosesini manipulyasiya etməkdir”.


Paylaş: