Xəzər Universitetindən maaş azlığına və müəllimlərin istismarına etiraz olaraq istefa verən fəlsəfə doktoru Mail Yaqub daha bir açıqlaması ilə gündəm yaradıb.

Mail Yaqub Axar.az-a açıqlamasında bildirib ki, tələbələrdən yığılan külli miqdarda vəsait müqabilində müəllimlərinə cüzi maaş verən və onları alçaldan universitetin qazancı təsisçi Hamlet İsaxanlının böyük biznesinin qurulmasına sərf olunur.

“Hamlet İsaxanlı Buzovna ilə Mərdəkan arasında “Khazar Golden Beach” adlı olduqca böyük və dəbdəbəli otel tikdirib. Otelin açılışı bir neçə ay öncə baş tutdu. Xəzər Universitetində tələbələrdən yığılan külli miqdarda vəsait qarşılığında müəllimlərinə cüzi maaş verən və onları təhqir etməkdən çəkinməyən universitet rəhbəri yığılan yüksək təhsilhaqqını gənclərin haqq etdiyi təhsili almasına deyil, onmilyonlara başa gələn otelə xərcləyir”.

Qeyd edək ki, M.Yaqub “hər il tələbələrindən fantastik məbləğdə pul yığıb fədakar müəllimlərinə qəpik-quruş əmək haqqı verməklə onları təhqir edən, tələbə və müəllimlərinin fikrinə zərrə qədər də dəyər verməyən” kimi xarakterizə etdiyi Xəzər Universitetindən istefa verib. O bildirib ki, təqribən 40 nəfərlik auditoriyaya həftədə 2 dəfə 90 dəqiqə dərs deyən müəllimə bir qrup qarşılığında 160 manat məvacib yazılır. Auditoriyada çox tələbənin olması dərsin keyfiyyətini azaltsa da, demək olar ki, son illər tələbələr qruplara bölünmür (ingilis dili dərsləri istisna olmaqla).








Paylaş: