Prezident İlham Əliyev tərəfindən general Əli Nağıyevin Dövlət Təhlükəsizlik Xidmətinin rəhbəri vəzifəsinə gətirilməsi mütəxəssislər tərəfindən yüksək qiymətləndirlməkdə və təqdir edilməkdədir.

Məsələ ilə bağlı Moderator.az-a açıqlama verən siaysi elmlər doktoru, politoloq Cümşüd Nuriyev də bu təyinatın ölkənin milli təhlükəsizliyinin təminatı baxımından mühüm önəm kəsb etdiyini vurğuladı:

“Bu təyinatı çox yüksək dəyərləndirirəm. Əli Nağıyev Namiq Abbasovdan sonra Azərbaycanın milli təhlükəsizlik orqanına rəhbərlik edəcək ən layiqli simadır. Mənim Mədət Quliyevə böyük hörmətim olsa da, deməliyəm ki, o, bu sahənin adamı deyildi.

Əli Nağıyevi mən Qarabağ döyüşlərindən yaxşı tanıyıram. Vaqif Hüseynovun da, İlhüseyn Hüseynovun da, Namiq Abbasovun da vaxtında peşəkar bir kəşfiyyatçı kimi formalaşıb.

Təhlükəsizlik dövlətimiz üçün olduqca vacibbir məsələdir. Açıq etiraf edək ki, Eldar Mahmudov gedəndən sonra da bununla bağlı müəyyən problemlər var idi. Çünki o getsə də, yığdığı komanda qalmışdı.

Polisin təhlükəsizlik xidmətinə gəlməsi bu xidməti polisləşdirir. Polis təhlükəsizlik orqanının əməkdaşı kimi düşünə bilmir. Onun düşüncə tərzi daha çox daxili təhlükəsizliyə hesablanıb. Daxili təhlükəsizlik milli təhlükəsizliyin bir hissəsi olsa da, bütövlükdə milli təhlükəsizlik deyil. Buna görə də onların günahı yoxdur. Bu şəxslər orada işləsələr də, onların düşüncə tərzi əməliyyat-axtarış səviyyəsindən yuxarı getmir. Indi isə tam əminəm ki, Əli Nağıyev əsl peşəkar kimi bu orqanın əvvəlki şöhrətini bərpa edəcək. Eyni zamanda, inanıram ki, əks-kəşfiyyat yenidən bu quruma birləşdiriləcək.

Əli Nağıyevin bu quruma gətirilməsini Azərbaycanın mili təhlükəsizliyinin xilası kimi dəyələrndirirəm. Ölkə başçısı tərəfindən generalların yerdəyişməsini son 10 ilin ən uğurlu yerdəyişməsi hesab edirəm. Çünki onlaırn hər biri öz sahəsində peşəkardır”.


Paylaş: