Azərbaycan Milli Elmlər Akademiyasının (AMEA) Mərkəzi Elmi Kitabxanası tərəfindən keçirilən tender müsabiqəsinin qalibi məlum olub.
Yeniavaz.com xəbər verir ki, tender müsabiqəsinin qalibi “Alov-Mühafizə” MMC olub.
“Alov-Mühafizə” MMC 11 ay ərzində 6 nəfər mühafizəçi və 1 nəfər qeydiyyatçı olmaqla AMEA Mərkəzi Elmi Kitabxanasının mühafizəsini təşkil edəcək. Bu xidmətin qarşılığında AMEA Mərkəzi Elmi Kitabxanası “Alov-Mühafizə” MMC –yə 50 min 8 manat 22 qəpik ödəyəcək.
Məlumt üçün bildirək ki, “Alov-Mühafizə” MMC 21.04.2009-cu il tarixində dövlət qeydiyyatına alınıb. Hüquqi ünvanı “Nizami rayonu, Əli Əliyev, ev 16, m. 68”-də yerləşən MMC-nin nizamnamə kapitalı 20 manat təşkil edir. Şirkətin qanuni təmsilçisi Talıbov Xalis Yunus oğludur.
Qeyd edək ki, 4 ay əvvəl AMEA Mərkəzi Elmi Kitabxanasının keçirdiyi analoji tenderin qalibi “Vətən-N Mühafizə Xidməti” MMC olub.
“Vətən-N Mühafizə Xidməti” MMC 6 ay ərzində AMEA Mərkəzi Elmi Kitabxanasının mühafizəsini təşkil etmək üçün 39 min manat alıb.
“Vətən-N Mühafizə Xidməti” MMC yeni yaranıb. Rəsmi məlumatlara görə MMC 27.01.2020-ci il tarixində dövlət qeydiyyatına alınıb. Hüquqi ünvanı “Xəzər rayonu, Şüvələn ŞTQ, ev 921 K”-da yerləşən MMC-nin nizamnamə kapitalı 300 manat təşkil edir. Şirkətin qanuni təmsilçisi Qasımov Etibar Ağahüseyn oğludur.
Qasımov Etibar Ağahüseyn oğlu eyni zamanda Azərbaycanın tanınmış özəl mühafizə şirkətlərindən biri olan “Riyad Mühafizə Xidməti” MMC-nin qanuni təmsilçisidir.
Onu da bildirək ki, mətbuatda yayılan sənədlərdə (15 mart 2019-cu il tarixli) Qasımov Etibar Ağahüseyn oğlunun eyni zamanda “Alov-Mühafizə” MMC-yə rəhbərlik etdiyi (Baş idarə rəisi) qeyd olunub. Mətbuatda “Alov-Mühafizə” MMC-nin də “Riyad Mühafizə Xidməti” MMC-nin bazası əsasında yaradıldığı bildirilib.
Xatırladaq ki, 2009-cü ildə təsis olunan “Alov-Mühafizə” MMC əsasən təhsil müəssisələri olmaqla Azərbaycanda yüzlərlə dövlət müəssisəsinin mühafizəsini təşkil edir. Mühafizə xidmətilə bağlı keçirilən dövlət satınalmalarının bir çoxunda məhz “Alov-Mühafizə” MMC qalib olur.
Maraqlıdır ki, cəmi 4 ay əvvəl AMEA-nın keçirdiyi tender müsabiqəsində Qasımov Etibar Ağahüseyn oğlu Azərbaycanda onlarla, yüzlərlə dövlət müəssisəsinin mühafizəsini təşkil edən “Alov-Mühafizə” MMC, ya da 2009-cu ildən fəaliyyət göstərən “Riyad Mühafizə Xidməti” MMC ilə deyil, yeni yaranan “Vətən-N Mühafizə Xidməti” MMC ilə iştirak edib.
Onu da bildirək ki, Etibar Qasimov eyni zamanda İctimai Nəzarət Koalisiyasının sədr müavinidir. İNK sədri isə bir müddət əvvəl qalçaqllı videosu ilə gündəmə gələn 187 saylı məktəbin direktoru Nailə Məmmədovanın qardaşı Rasim Məmmədovdur.
Məlumat üçün onu da qeyd edək ki, AMEA-nın İşlər İdarəsi mühafizə xidmətinin satın alınması məqsədilə daha əvvəl kotirovka sorğusu elan edib. Kotirovka sorğusu barədə elanı “Xalq qəzeti”nin rəsmi veb-səhifəsinə 18.09.2020-ci il tarixində saat 00:18-də yerləşdirilib. Tender elanında kotirovka sorğusunda iddiaçı kimi iştirak etmək istəyənlərin imzalanıb möhürlənmiş kotirovka təkliflərini 17 sentyabr 2020-ci il saat 12.00-dan gec olmamaq şərtilə təqdim etmələri qeyd olunub. Bildirilib ki, göstərilən müddətdən gec təqdim olunan kotirovka təklifləri baxılmadan geri qaytarılacaqdır. Maraqlıdır ki, 17.09.2020-ci il saat 12.00-da başa çatan müsabiqə elanı 18.09.2020-ci il saat 00:18-də açıqlanıb.






Paylaş: