Qarabağ veteranı, Bakıdakı orta məktəbdə müəllim işləyən Vaqif Əlisoy Təhsil naziri Emin Əmrullayevə və Bakı Şəhəri üzrə Təhsil İdarəsinin müdiri Rəşad Tağıyevə müraciət edərək, təhsildən uzaqlaşdırlmasının qarşısını almağı xahiş edib. Modern.az-ın məlumatına görə, V.Əlisoy müraciətində bildirib:

“Azərbaycan Respublikasının Təhsil naziri Emin Əmirullayevə və Bakı Şəhəri üzrə Təhsil İdarəsinin müdiri Rəşad Tağıyevə aşağıdakı şəkillə bir xatırlatma edirəm.
Cənablar, ölkənin müharibə şəraitində, 65 yaşı bəhanə edib mənim kimi müəllimləri məktəbdən uzaqlaşdırmağın yalnız bir adı var, düşmən dəyirmanına su tökmək. Həm millət və dövlət qarşısındakı xidmətlərimi, həm də təhsil sahəsində qazandığım nəticələri ortaya qoyub Sizdən cavab istəyirəm. Budurmu cənab Prezidentin, Ali Baş Komandanın Qarabağ əlil və vetaranlarına qayğı göstərmək barədə göstərişlərinə verilən cavab?
Araşdırın, Azərbaycan məktəblərində işləyənlər arasında mənim kimi müəllimlərin sayı nə qədərdir? Mən zamanında ən yüksək vəzifələrə dəvət edildim. Ancaq birinci Qarabağ savaşından sonra məktəbə qayıtmağı lazım bildim. Məqsədim bu millət, bu vətən üçün hər an döyüşə hazır olan gənclər yetişdirmək olub və mən buna nail olmuşam.
Bunu da sizə faktlarla sadalayıram. Şagirdlər və gənc müəllimlər üçün 1988-ci ildən başlayan erməni-rus işğalına qarşı igid oğulları başına yığıb döyüşə atılan, 1990-cı ilin 20 yanvar hadisələrində həbs olunaraq Rusiya həbsxanalarında saxlanılan, Xocalı və Qarabağ döyüşlərinin canlı şahidi olan, həmin vaxtlarda həyatını təhlükəyə atıb qeyrətli oğullarla yüzlərlə şəhid meyitini, qız-gəlini, əsir və girovu düşmənin əlindən alıb doğmalarına qaytaran, bu yolda qohumlarını, dostlarını, yaxınlarını itirən bir Qarabağ qazisinin, bir ziyalının, bir müəllimin keçdiyi yol nümunə deyilmi?
Mənim necə müəllim olduğumu işlədiyim məktəbin rəhbərliyi, iş yoldaşlarım, şagirdlərim və onların valdeynləri deyə bilər!
Dövlət və millət qarşısında xidmətlərimi bir tərəfə qoyuram. Bu xidmətlərim üçün heç "sağ ol!" da almamışam. Nə etmişəm, millətimiz və dövlətimiz üçün etmişəm. Bunu da məni tanıyanlar arasında bilməyən yoxdur.
Gənclərimiz üçün vətənpərvərlik ruhu aşılayan - Qarabağ döyüşlərindən bəhs edən "Kaş gözlərim kor olaydı" bədii-sənədli kitabın müəllifiyəm.

Hörmətli cənablar, təhsil sahəsindəki nəticələrimi də xatırladım: 2017-18-ci tədris ilində şagirdim Zamanlı Lamiyə respublika fənn olimpiadasında Azərbaycan dili və ədəbiyyatı fənni üzrə gümüş medal almış və həmin ildə 686 balla Dövlət İdarəçilik Akademiyasına qəbul olunmuşdur.
20-ci ildə dərs dediyim 11-ci sinfi bitirmiş 42 məzundan 35 nəfəri yüksək bal toplayaraq müxtəlif universtetlərə qəbul olunmaq ərəfəsindədirlər. Onlardan aşağıdakıları qeyd edə bilərəm:

Hüseynəliyeva Duyğu - 651 bal
Hidayətova Aytən - 641 bal
Mahmudova Vəsilə - 640 bal.
Mahmudova Rəşidə - 580 bal
Nəcəfova Nuray - 540 bal
Hümbətov Hümbət - 549 bal
Məhərrəmova Nəzrin - 537 bal
Məhərrəmli Şamxal - 528 bal
İsmayılzadə Aysu - 516 bal
Nəsibova Elza - 420 bal

Bunlar ən yüksək nəticə göstərən şagirdlərimdir.
Cənablar, mən dövlət, millət qarşısında xidmətlərimi, təhsil sahəsindəki uğurlarımı Sizin diqqətinizə çatdırdım. İndi deyin görək, Sizə nə cür müəllim lazımdır?”.


Paylaş: