"Milli Şura"nın koordinasiya mərkəzinin üzvü Gültəkin Hacıbəylinin Müsavat partiyasını müxtəlif məsələlərdə xəyanət və satqınçılıqda ittiham etməsinin ardınca, qarşı tərəfin cavabları da gecikməyib. Müsavat partiyasının başqanı Arif Hacılı sosial şəbəkədə ona və rəhbərlik etdiyi partiyasına qarşı suçlamaları cavablamaqla bir sıra adekvat cavablarda bulunub.

SİA.AZ A.Hacılının bəzi fikirlərini diqqətə çatdırır.

"Tofiq Yaqublunu niyə "Milli Şura" sədri seçmirsiniz, Cəmil Həsənli bu barədə təklif etmişdi, necə oldu?"

"Gültəkin Hacıbəyli Müsavat partiyasını ağır cinayətdə ittiham edib. Ağır cinayəti bilib gizlətmək ciddi cinayət sayılır", deyə qeyd edən Hacılı hətta tələb də irəli sürüb: "Tələb edirəm. Onda olan məlumatları Baş Prokurorluğun Ağır Cinayətlərə Dair İstintaq idarəsinə təqdim etsin. Əks təqdirdə bizim onu böhtana görə məhkəməyə verməyimiz vacib olacaq".

G.Hacıbəylinin "Milli Şura"nın koordinasiya şurasının üzvü Tofiq Yaqublunun Müsavat partiyasının Məclisinə seçilməməsinə də münasibətini açıqlayan A.Hacılı əks arqumentlə Hacıbəyliyə sual ünvanlayıb: "Tofiq Yaqublunu niyə "Milli Şura" sədri seçmirsiniz, Cəmil Həsənli bu barədə təklif etmişdi, necə oldu?"

"Sədr kimi nə bir toplantısı var, nə bir hesabatı, nə də seçkisi"

Müsavat daxilində keçirilən seçkiləri hədəfə alan G.Hacıbəyliyə növbəti sualını da ünvanlayan Müsavat başqanı əslində "Milli Şura"nın saxtakarlıqlara yol verdiyini bildirib: "Təmsil olunduğunuz təşkilatın sədr seçkisindən 7 il keçib. Sədr kimi nə bir toplantısı var, nə bir hesabatı, nə də seçkisi. Bizdən dəftərxana məlumatlarımızın bundan daha şəffaf olmasını tələb edən kəs bu barədə nə düşünür?

Yoxsa Tofiq Yaqublu adı sizə yalnız Müsavata hücum etmək üçün istinad nöqtəsi kimi lazımdır?"

"Əgər AXCP-də azad, gizli seçki keçirilsə şəxsən siz orada heç vaxt Məclis üzvü seçilə bilməzsiniz, əmin olun"

A.Hacılı ittihamlarını davam etdirərək G.Hacıbəylinin "Milli Şura"nın koordinasiya şurasına elə də bel bağlamamalı olduğunu da deyib və koordinasiya mərkəzinə istehzalı münasibət olaraq oranı "direktorlar şurası" adlandırıb: "Bir-iki nəfərin himayəsi ilə AXCP üzərində direktorlar şurasının üzvü olmağınıza çox güvənməyin. Əgər AXCP-də azad, gizli seçki keçirilsə şəxsən siz orada heç vaxt Məclis üzvü seçilə bilməzsiniz, əmin olun".

"Milli Şura"nın artıq tükəndiyini və eləcə də müxalifətdəki digər partiyaları özünə düşmən qazandığını qeyd edən Müsavat partiyasının başqanı fikirlərini sərt ittihamlarla başa çatdırıb.

"Milli Şura"nı bitirmisiniz, körpüləri yandırmaqla məşğullsunuz"

"Ölkənin bütün passionar təbəqəsini, müsavatçılardan tutmuş, PEAL-çılara, inanclı kəsimin nümayəndələrindən tutmuş, cümhuriyyətçılərə qədər hamını "Milli Şura" ilə düşmən etdiniz. "Milli Şura"nı bitirmisiniz. İndi də Müsavatla AXCP arasında onsuz da gərgin olan münasibətləri tam korlamaq, qırmızı xəttləri götürmək, körpüləri yandırmaqla məşğulsunuz", A.Hacılı ittihamlarını başa çatdırıb.


Paylaş: