Azərbaycanın aparıcı banklarından olan, bir qədər əvvəl rebrendinq yaşayan «Yelo Bank»ın rəhbərliyində və mühüm postlarında ciddi dəyişikliklər - təyinatlar var.

«Yelo Bank»ın idarə heyəti sədrinin birinci müavini Fərhad Hacınski işindən ayrılıb.

FED.az xəbər verir ki, «Yelo bank» Farhad Hacinskinin çalışıb tərk etdiyi 3-cü bankdır. Cənab Hacınski müxtəlif illərdə «Bank Respublika»nın Kredit Departamentinin müdiri, KredAqro qeyri-bank Kredit Təşkilatının Müşahidə Şurasının üzvü, Caspian Beynəlxalq İnvestisiya Şirkətinin (CIIC) İnvestisiyalar üzrə Direktoru, «Rabitəbank» QSC-nin İdarə Heyəti sədrinin müavini kimi bir sıra rəhbər vəzifələrdə çalışıb.

Bundan başqa, bankın Rəqəmsal bankçılıq, Brendin idarəedilməsi və Müştəri təcrübəsi üzrə Baş direktoru David Birman da işdən ayrılıb. Eləcə də, bankın korporativ müştərilərlə işə departamentinin direktoru və eyni zamanda Kiçik kredit komitəsinin sədri Emil Rüstəmov da işdən azad edilib.

F.Hacınskinin yerinə, yəni «Yelo bank»ın idarə heyəti sədrinin birinci müavini vəzifəsinə İH sədrinin digər müavini – Fuad Tağıyev təyin edilib. O karyerasına elə «Nikoil bank»da başlayıb və artıq 15 ildir bu bankda çalışır.

«Yelo bank»da daha bir yüksək təyinat Yaşar Kərimovun bankın idarə heyəti sədrinin müavini təyin edilməsi olub. Y.Kərimov bundan əvvəl «Express bank»da çalışıb, İnformasiya texnologiyaları, Biznesin inkişafı və Pərakəndə Bankçılıq Departamentlərinin rəhbəri olub. Sonra qısa müddətdə «Bank Respublika»da müşavir vəzifəsində işləyib, indi isə «Yelo bank»da idarə heyəti sədrinin müavini təyin edilib.

Nəhayət, 2019-cu ilin sonunda «Yelo bank»da digər müşüm təyinat da baş vermişdi. Ölkənin aparıcı banklarından olan «Accessbank»ın icraçı direktorlarından biri Günay Cəlilova «Yelo bank»a icraçı direktor təyin edilib.

Günay Cəlilova bank sektorunda karyerasına 2006-cı ilin aprelində “Accessbank” QSC-də başlayıb, hansı ki, həmin il ərəfəsində bu bank “Azərbaycan Mikromaliyyələşdirmə Bankı” QSC adı altında (2008-ci ilə qədər) çıxış edirdi. Bankın rebrendinq ərəfəsində G.Cəlilova artıq bankın Filial Meneceri, daha sonra, yəni, 2016-cı ildən bu günə qədər isə Marketinq-Korparativ Bankçılıq Departamentində direktor vəzifəsində çalışıb. 2019-cu ilin aprelindən isə “Accessbank”ın icraçı direktoru vəzifəsinə təyin edilib.


Paylaş: