Bu ilin yanvar-iyun aylarında "Yaşıl Kart" Sistemi çərçivəsində Azərbaycan daxilində təqribən 2,1 min sığorta müqaviləsi rəsmiləşdirilib və həmin müqavilələr üzrə 2,5 milyon manat civarında sığorta haqqı yığılıb.

Bu barədə İcbari Sığorta Bürosu (İSB) məlumat yayıb.

Bildirilir ki, bu, 2022-ci ilin eyni dövrü ilə müqayisədə müvafiq olaraq 67 və 97 % çoxdur.

Hesabat dövründə 164 yol-nəqliyyat hadisəsinə görə 550 min manata yaxın sığorta ödənişi həyata keçirilib ki, bu da, illik müqayisədə müvafiq olaraq 40,2 % və 89,7 % çoxdur.

6 ayda bir hadisə üzrə ortalama sığorta ödənişi ötən ilin eyni dövrü ilə müqayisədə 34,2 % artaraq 3 309 manata çatıb.

“Müqayisə edilən dövr üzrə sığorta müqavilələrinin sayına nisbətdə baş verən sığorta hadisələri faiz etibari ilə azalmasına baxmayaraq ortalama sığorta ödənişinin 34 % artımı müşahidə olunub. Artımın təməl səbəbi Türkiyədə baş vermiş ölüm hadisəsi və sağlamlığa dəyən zərər üzrə ümumilikdə verilmiş 100 min manat civarında sığorta ödənişidir.

2022-2023-cü illərin ilk 6 ayı ərzində əsasən xarici ölkələrdə baş vermiş hadisələr üzrə zərərlilik nisbətləri də ciddi fərqlilik göstərməkdədir. Belə ki, ötən ilin ilk 6 ayı ərzində toplanan sığorta haqlarının 22 %-i həcmində sığorta ödənişi verilib, 2023-cü ilin müvafiq dövründə isə bu nisbət 7 % təşkil edib”, - İSB qeyd edib.