Noyabr ayında fiziki şəxslərin əmanətləri (müddətli və tələbli) 129.6 milyon manat azalıb. 
Azalma dollar əmanətlərinin geriləməsi ilə bağlıdır. Mərkəzi Bankın aylıq statistikasına görə, 2019-cu ilin oktyabr ayının sonunda 8 milyard 811 milyon 100 min manat təşkil etmiş əmanətlər Noyabr ayının sonunda 8 milyard 681 milyon 500 min manata düşüb. 
Maraqlıdır, əmanətlərin azalması nə ilə bağlıdır? 
İqtisadçı-ekspert Natiq Cəfərli  açıqlamasında əmanətlərin azalmasını iki səbəblə izah edib. N.Cəfərlinin sözlərinə görə, vətəndaşlar əmanətlərini banklardan çəkib daşınmaz əmlak alırlar:

“Valyuta hesabında əmanətlərin azalmasının səbəbi faizlərin aşağı düşməsidir. Hazırda valyuta əmənətləri 1-2 faiz civarındadır. Bu da vətəndaşlara sərf etmir. Ona görə də valyutaları ya manata çevirir, ya da valyutalarını çəkib əsasən xarici ölkələrdə daşınmaz əmlaka yatırmağa üstünlük verirlər. Çünki həmin ölkələrdə daşınmaz əmlakın ildən-ilə artım qiyməti təqribən 3-8 faiz arası olur. Bu da bankda əmanət saxlamaqdan daha sərfəlidir. Əmanətlərin azalmasının əsas səbəbi məhz bundan ibarətdir”. (cebhe.info)


Paylaş: