Zəncirvari qəza iki can alıb.

Ajans.az Xezerxeber.az-a istinadən xəbər verir ki, ağır yol nəqliyyat hadisəsi gecə paytaxtın Sabunçu rayonunda, Bakı-Olimpiya stadionunun yaxınlığında qeydə alınıb.

Daxili İşlər Nazirliyindən verilən məlumata görə, üç minik avtomobili toqquşub. Zərbənin təsirindən sürücülərdən biri Ramin Məmmədov və onun 2 yaşında qız övladı hadisə yerində ölüblər.

Avtomobildə xəsarət alan qadaın isə əraziyə gələn təcili tibbi yardım avtomobili ilə Sabunçu Tibb Mərkəzinə aparılıb.

Ata və azyaşlı övladının öldüyü zəncirvari yol qəzası ilə bağlı cinayət işi başlanıb.

Gecə daha bir ağır qəza Xəzər rayonunda olub. Hadisə Mərdəkan yolunun Buzovnaya ayrılan hissəsində qeydə alınıb. Sürücü Sadiq Mikayılov idarəetməni itirərək avtomobili yol kənarındakı dirəyə çırpıb.

Hadisə yerinə Xüsusi Riskli Xilasetmə Xidmətinin və təcili tibbi yardım birqadasının əməkdaşları da gəlib. Deformasiyaya uğrayan avtomobildən 18 yaşlı Sadiq Mikayılov çıxarılsa da onda həkimə qədər ölüm faktı qeydə alınıb.

Faktla bağlı araşdırma aparılır.

Mövzu ilə bağlı daha ətraflı videomaterialı təqdim edirik.