Masallı rayonu Qədirli kənd sakini Qasımov Mirəddin Akif oğlu AzTimes.az-a müraciət edərək Lənkəran Şəhər Rayon Polis Şöbəsinin Dövlət Yol Polisi Bölməsinin əməkdaşları tərəfindən şərləndiyini iddia edir.

Sürücü bildirir ki, idarə etdiyi ZİL MMZ 554 markalı, 90 KR 110 Dövlət qeydiyyat nişanlı yük nəqliyyat vasitəsi ilə özünə məxsus ot bağlamalarını satmaq məqsədilə Lənkəran rayonuna apararkən Vilvan kəndində heç bir yol nəqliyyat hərəkəti pozuntusu etmədiyi halda Lənkəran rayonu Yol patrul xidmətinin inspektoru tərəfindən saxlanılır.

Sürücünün iddiasına görə özünü Lənkəran rayonu Yol patrul xidməti inspektoru polis sıravisi Məmmədli Mahir Şakir oğlu kimi təqdim edən əməkdaş əvvəlcə sürücüdən şirinlik adıyla rüşvət istəyir. Qarşılaşdığı vəziyyətə öyrəncəli olan sürücü polisə beş manat pul verir. Polis sıravisi beş manat pulun az olduğunu bildirərək, pulu sürücüyə qaytarır.

Sonra sürücüyə yol nişanı qaydalarının tələbini pozduğunu və sərxoş olduğunu əsas gətirərək heç bir hal şahidi olmadan, sürücünü yerindəcə alkotester edirlər. Sonra “sərxoş” sürücünün özünə nəqliyyat vasitəsini idarə edərək Lənkəran Şəhər Rayon Polis Şöbəsinin Dövlət Yol Polisi Bölməsinin cərimə meydançasına getməsini tələb edirlər. Sürücü ZİLini sürərək meydançaya gedir.

Polis Bölmədə sürücü Mirəddin Qasımov sərxoş olmadığını bildirərək, həkim müayinəsindən keçmək istədiyini bildirir. Lakin onun bu istəyinə məhəl qoyan olmur.

Vəziyyəti belə görən Mirəddin Qasımov həkim müayinəsindən keçmək üçün Lənkəran Rayon Mərkəzi Xəstəxanasına gedir. Lakin həkimlər onun yanında polis əməkdaşı olmadığını əsas gətirərək tibbi müayinədən keçirmirlər.

Sürücü yenidən polis idarəsinə qayıdır. İdarədə ona İnzibati Xəta Haqqında Protakol tətbiq edilərək, İnzibati Xətalar Məcəlləsinin 327.1-ci və 333.1-ci maddələrinə uyğun cərimə yazılır. Bildirək ki, 400 manatlıq həmin cərimələr Yol hərəkəti Nişanının tələbinin pozulması və sərxoşluğa görədir.

Daha sonra polis əməkdaşları sürücüyə bildirirlər ki, nəqliyyat vasitəsini cərimə meydançasından götürüb gedə bilər. Sürücü protakolun surətini və nəqliyyat vasitəsini özü idarə edərək cərimə meydançasını tərk edir.

Burada bir neçə qaranlıq sual yaranır.

Sürücü sərxoşdursa nə üçün tələb etməsinə baxmayaraq həkim müayinəsinə aparılmır.

Sürücü alkotester yoxlamasından keçirsə nə üçün hal şahidi dəvət edilmir?

Əgər sürücü həqiqətən də sərxoş idisə nə üçün saxlanıldığı yerdən cərimə meydançasına, sonra isə cərimə meydançasında çıxaraq nəqliyyat vasitəsini özü idarə edir?

Saytımıza etibarlı mənbədən daxil olan məlumata görə bu Lənkəran Şəhər Rayon Polis Şöbəsinin Dövlət Yol Polisi Bölməsi tərəfindən sürücülərə qarşı edilən ilk belə hal deyil.

Polis mayoru Mirxəyal Hüseynov 8 aydır ki, bölməyə rəisi təyin ediləndən Lənkəran DYPsi sürücülərə qənim kəsilib. Tabeliyində olan polis əməkdaşlarını da boğaza yığaraq onlara plan qoyub ki, gün ərzində qanuni, qeyri qanuni hər biri ən azı 3-4 avtomobil cərimə meydançasına gətirməlidir. Sonra isə, həmin nəqliyyat vasitələri Mirəddinin başına gətirilən oyuna bənzər cərimələnərək “azadlıq”a buraxılır.

Hazırda əlacsız qalan Mirəddin Qasımov pozulduğu hüquqlarının bərpası və özbaşınalıq edən polis əməkdaşının cəzalanması üçün saytımız vasitəsi ilə Daxili İşlər Naziri cənab Vilayət Eyvazovdan, Baş Prokurur cənab Kamran Əliyevdən kömək istəyir.

Pərvin Abışova/AzTimes.az/