ABŞ Konqresinin aşağı palatasının üzvləri artıq səlahiyyət müddəti başa çatmış Trampın impiçmenti barədə qətnaməni parlamentin yuxarı palatası olan Senata təqdim ediblər.

Təqdimetmə prosesi Nümayəndələr Palatasının rəsmi saytında canlı olaraq yayımlanıb. Sənəddə “üsyana təhriketmə” olmaqla, yalnız bir ittiham öz əksini tapıb.

Budəfəki impiçment proseduru ABŞ tarixində bir sıra ilklərlə yadda qalıb.

Əvvəla, ilk dəfədir ki, bir prezidentə qarşı ikinci impiçment iddiası irəli sürülüb. Digər tərəfdən də ittiham olunan prezidentin səlahiyyət müddəti artıq başa çatıb.

Beləliklə də, impiçment proseduru fevralın 8-də başlayacaq. Prosesdə nümayəndələr palatasının üzvləri ittihamçı, senat üzvləri isə andçılar qismində çıxış edəcəklər.

İmpiçmentin elan olunması üçün senatorların 2/3 hissəsi (67 senator) ittihamnamənin lehinə səs verməlidir. Senatın qərarından apelyasiya şikayəti verilə bilməz.

Qeyd edək ki, artıq hazırkı Prezident Co Bayden məsələyə öz münasibətini bildirib. Onun fikrincə, Trampa qarşı ikinci impiçment proseduru da uğursuz olacaq.


Paylaş: