“Barselona”, “İnter” və “Anji” kimi klubların keçmiş hücumçusu, Kamerun Futbol Federasiyasının rəhbəri, tanınmış eks-futbolçu Samuel Etoo DÇ-2022-nin 1/8 final mərhələsinin Braziliya - Cənubi Koreya matçından (4:1) sonra gənc azarkeşlə münaqişə yaşayıb.

41 yaşlı Kamerunlu FİFA səfiri stadionu tərk edərkən bir neçə azarkeş şəkil çəkdirmək üçün ona yaxınlaşıb.

Onların arasında kamerası olan bir adam da olub və Etoonu çəkməyə başlayıb.

Samuel buna qarşı çıxıb. Etoonun ətrafındakılardan biri kameranı azarkeşin əlindən alıb. Kamerunlu özü azarkeşə tərəf irəliləməyə və ondan nəsə tələb etməyə başlayıb. Daha sonra isə onu ağız nahiyəsinə təpiklə zərbə endirib.