Qarşıdan qış gəlir. Qışın sərt keçəcəyini payızın xarakterinə yad olan soyuqlardan hiss etmək mümkündür.

Bu il sentyabr ayının sonu- oktyabrın əvvəlləri Bakıya yağan yağış paytaxt sakinlərinə ciddi problemlər yaradıb. Yəni işığın fasilələrlə verilməsi ilə yanaşı, yollarda yaranan tıxaclar şəhər sakinlərini narahat edib. Bu narahatlıq qışda Bakıya qar yağanda daha çox yaşanır. Yolların buz bağlaması avtomobillərin hərəkətinə mane olur. Vaxtında görülməyən tədbirlər insanların saatlarla yollarda qalmasına, yol qəzalarına səbəb olur.

Baxmayaraq ki, qurumlar hələ yayın sonunda payız və qışa hazır olduqlarını bildirirlər.

Milli Hidrometeorologiya Xidmətinin rəisi Umayra Tağıyeva da sentyabrda havanın ötən ilin eyni vaxtı ilə müqayisədə 3,3 dərəcə aşağı olduğunu, yağıntının miqdarının normadan artıq düşdüyünü deyib. Qurum növbəti dəfə yağan yağışların sulu qara keçəcəyini, qışın tez düşəcəyini və soyuq keçəcəyini bəyan edib.

Bakı Şəhər İcra Hakimiyyəti builki qışa necə hazırlaşıb? Bakı Şəhər İcra Hakimiyyəti Mənzil-Kommunal Təssərrüfat Departamentinin Sanitariya və Texniki Təmizlik İdarəsinin rəisi Mübariz Hüseynov Cebhe.info-ya bildirib ki, artıq qışa hazırlıq işlərinə başlanılıb:

“Bakı Şəhər İcra Hakimiyyətində bu məsələ barədə iclas keçirilib. Bakı Şəhər İcra Hakimiyyətinin rəhbərliyinin göstərişinə əsasən, artıq qış mövsümünə hazırlıq işlərinə start verilib. O cümlədən, duz ehtiyatı yaradılıb və bütün texnikalar dəfə texniki baxışdan keçirilib”.

İdarə rəisi hazırda anbarlarda 1000 tondan çox duz ehtiyatı olduğunu bildirib: “Artıq yollardakı buzların əriməsində qumdan yox, duzdan istifadə edilir. 5000 tondan çox duz ehtiyatı yaradılması nəzərdə tutulub. Hazırda tenderimiz keçirilib, vəsait ödənilib, hissə-hissə duzu daşıyıırıq”.

Mübariz Hüseynov istifadə olunan duzun yollara və avtomobillərə yalnız bir halda ziyan vuracağını qeyd edib: “Duzun yol və avtomobillərə heç bir ziyanı yoxdur. Duz yerdə uzun müddət qaldığı halda ziyanlıdır. Duz hər kvadratmetrə, təxminən 500 qram duz səpilir. Qar əridikcə, o, suya dönüb, axır gedir”.


Paylaş: