Xəbər verdiyimiz kimi, Xalq artisti Ağadadaş Ağayev Türkiyənin İstanbul şəhərində özəl klinikaların birinə yerləşdirilib. Xərçəng xəstəliyindən əziyyət çəkən Xalq artisti əməliyyat olunub.

Sənətçinin son durumu ilə bağlı Əməkdar artist Aybəniz Haşımova məlumat verib.

Yenisabah.az-a danışan Haşımova Ağadadaş Ağayevə görə çox sarsıntı keçirdiyini deyib:

“O gün sosial şəbəkədə qarşıma bir xəbər çıxdı: Ağadadaş Ağayev xəstədir deyə. Çox narahat oldum, mən də bir vətəndaşam, mənim də sevdiyim səslər var. Götürüb telefonuna zəng vurdum, amma açmadı. Daha çox narahat oldum. Bir az keçdi Ağadadaş müəllimin özündən mənə zəng gəldi. Siz inanın ki, telefonda onun səsini eşidib uşaq kimi ağladım, amma ona bildirmədim. Əgər o məni görsəydi, ağlayardı. Ağadadaş müəllim telefonun o biri ucunda danışırdı, mənsə bu tərəfdə sakit-sakit ağlayırdım. Mərhum Xalq artisti İlham Əsgərov vardı, biz uzun illər toylara onunla birlikdə getmişik, elə bilirdim sağ əlimdir. Bir dəfə xəbər gəldi ki, İlham Əsgərov ağır insult keçirib və xəstəxanadadır. Bunu eşidib zəng etdim, bir Allah bilir ki, mən onda nələr çəkdim, içimdə qara qanlar axırdı. Dua edirdim ki, nə olar bircə özü götürsün, səsini eşidim. Bir sevdiyinin səsinə möhtac qalmaq qədər həyatda ağır bir şey yoxdur”.

Sənətçi həmkarı ilə telefon əlaqəsi saxladığını, onun vəziyyətinin hazırda yaxşı olduğunu deyib:

“Ağadadaş müəllimlə danışanda da narahatlığımı bildirdim, dedim bütün mətbuat bu barədə yazır. Dedi ki, “əməliyyat olmuşam, indi yaxşıyam, sağolmuşlar, vəziyyəti bir az şişirdiblər, yaxşıyam, mənə görə heç kim narahat olmasın”. Nə qədər gözəldir sevdiyin insanların “yaxşıyam” deməsi...”


Paylaş: