Belarusun Polşada yerləşən “Nexta” müxalifət media orqanı Aleksandr Lukaşenkonun dəbdəbəli həyatı haqda araşdırma filmi yayımlayıb.

“Lukaşenko. Qızıl dib” adlı film martın 8-də Yutub-da yayılıb.

Araşdırmada Lukaşenkonun villalarının, bahalı avtomobillərinin olduğu iddia edilir, şəxsən istifadə etdiyi hədiyyələrdən söz açılır.

Lukaşenkonun korrupsioner belaruslu və xarici biznesmenlərə qoruma təklif etdiyi qeyd olunur. Özəlliklə Minsk yaxınlığındakı Krasnoselskoyedə dəbdəbəli iqamətgahdan bəhs edilir. "Nexta"-ya görə, rusiyalı oliqarx Mixail Qutseriyev bu mülkü Lukaşenkoya qoruma əvəzinə hədiyyə edib.

1994-cü ildən hakimiyyətdə olan Lukaşenko ötən həftə deyirdi ki, onun yeganə sarayı vaxtilə anasının onu böyütdüyü, sahəsi 60 kvadrat metrdən də az kiçik mənzildir.

Lukaşenko avtoritar idarəçiliyi dövründə konstitusiyanı bir neçə dəfə dəyişib, nəticədə Belarus “Avropanın sonuncu diktaturası”na çevrilib. O, ötən avqustda prezident seçkisinin rəsmi qalibi elan olunandan sonra ölkəni kütləvi etirazlar bürüyüb. Etirazlar zamanı onlarla jurnalist daxil olmaqla minlərlə belaruslu saxlanıb. Bəzilərinə həbs cəzası kəsilib, yüzlərlə insan saxlanarkən, yaxud küçələrdə döyüldüyünü deyib.

Avropa Birliyi prezident seçkisinin saxtalaşdırılması, dinc etirazçılara qarşı zorakılıq və polis qəddarlığına görə Lukaşenko daxil olmaqla, Belarus hakimiyyətinə üç dəfə sanksiya tətbiq edib.

Beynəlxalq Olimpiya Komitəsi (BOK) isə Lukaşenkonun böyük oğlu Viktor Lukaşenkonu Belarusun Milli Olimpiya Komitəsinin (MOK) yeni sədri kimi tanımaqdan imtina edib.

MOK-a 1997-ci ildən ötən ayadək Aleksandr Lukaşenko sədrlik edirdi. Onun oğlu Viktor ötən ayın sonunda MOK-un yeni sədri elan olundu. Daha öncə isə prezidentin milli təhlükəsizlik üzrə müşaviri idi.

Viktor Lukaşenko və Baskau da AB-nin ötən il sanksiya tətbiq etdiyi şəxslər siyahısındadır. Baskau Lukaşenkonun yaxın müttəfiqi hesab olunur, noyabrda Lukaşenkoya qarşı çıxan etirazçı Raman Bandarenkanın ölümündə onun adı hallanırdı. (azadliq.org)

[media=https://youtu.be/JEbKtZRAGGI]



Paylaş: