Vergi ödəyicisi tərəfindən artıq ödənilmiş vergilər, faizlər və maliyyə sanksiyasının geri qaytarılması Vergi Məcəlləsinin 85.5-ci, 87-ci və Nazirlər Kabinetinin 16 iyul 2019-cu il tarixli 313 nömrəli Qərarı ilə təsdiq edilmiş "Artıq ödənilmiş vergilərin, məcburi dövlət sosial sığorta və işsizlikdən sığorta haqlarının, faizlərin və maliyyə sanksiyalarının qaytarılması Qaydaları" əsasında həyata keçirilir.

Dia.az məlumat verir ki, vergi hüququ üzrə ekspert Sirac Piriyevin bildirdiyinə görə, artıq ödənilmiş vergilər vergi ödəyicisinin digər vergilər, faizlər, maliyyə sanksiyaları və inzibati cərimələr üzrə borcu olduqda, ilk növbədə onların ödənilməsinə aid edilir. Həmçinin artıq ödənilmiş vergilər vergi ödəyicisinin razılığı ilə sonrakı öhdəliklər üzrə ödəmələrin hesabına da aid edilə bilər. Artıq ödənilmiş vergilərin geri qaytarılması üçün vergi ödəyicisi Qaydaların 3-cü bəndinə uyğun olaraq qeydiyyatda olduğu və ödənilən vəsaitlərin büdcəyə daxil olmasını təmin edən vergi orqanına müvafiq ərizə ilə müraciət etməlidir.

Qaydaların 4.10-cü bəndinə görə yerli vergi orqanı 25 gün ərzində müvafiq rəy tərtib edərək aidiyyəti maliyyə orqanına təqdim etməlidir. Maliyyə orqanı isə 20 gün ərzində qaytarılmalı məbləği vergi ödəyicisinin bank hesabına köçürülməsini təmin etməlidir.

Vergi ödəyicisi tərəfindən ərizə verildiyi tarixdən 45 gün ərzində artıq ödənilən məbləğlər geri qaytarılmazsa, gecikdirilən hər gün üçün müvafiq məbləğin 0,1 faizi həcmində faizlər ödənilməlidir. Bununla bağlı vergi ödəyicisi yenidən müvafiq ərizə ilə yerli vergi orqanına müraciət edir.

Onu da bildirək ki, vergi ödəyiciləri artıq ödənilmiş vergilər, faizlər və maliyyə sanksiyasının geri qaytarılmasını Vergi Məcəlləsinin 85.5-ci maddəsinə uyğun olaraq 5 il ərzində tələb etmək hüququna malikdirlər.

Fins


Paylaş: