“Özünüməşğulluq proqramı ilə kəndçiyə iki ədəd inək verirlər, o da qapıdan girəndən üç gün sonra ölür”. 

Bunu deputat Siyavuş Novruzov Milli Məclisin bu gün keçirilən plenar iclasında müzakirəyə çıxarılan “Dövlət sosial müdafiə fondunun 2025-ci il büdcəsi haqqında” Azərbaycan Respublikası qanununun layihəsinə münasibət bildirərkən deyib.

“Şəhid ailələri və veteranlara hansı güzəştlərin verilməsi ilə bağlı çoxlu qanunlar, Prezidentin Fərmanı, icra hakimiyyətlərinin sərəncamları var. Nazirlik onların hüquq və imtiyazları ilə bağlı məlumatı portalda yerləşdirsə, şəhid ailələri və müharibə veteranları öz hüquqları barədə məlumatı oradan öyrənə bilərlər.

Bundan başqa, özünüməşğulluqla bağlı proqram çox yaxşıdır. Amma proqramın həyata keçirilməsi mexanizmində problemlər var. Başqa sahələri deyə bilmərəm, lakin kənd təsərrüfatı ilə bağlı şikayətlər çoxdur. Xəstə mal-heyvanları insanlara verirlər, o da qapıdan girəndən üç gün sonra ölür. Onların da bir dəfə almaq şansı var. Kəndçiyə iki inək verirsinizsə, ona bir illik qarantiya da verin. Heç olmasa üç aylıq da onun yeməyini verin. Çünki kəndçi onu ehtiyacdan alır”, - millət vəkili əlavə edib.

S. Novruzov qeyd edib ki, eyni zamanda müharibə veteranları ilə bağlı müraciətlər olur: “Onlar əlilliklə təyinatı almaq üçün müraciət edirlər. Ola bilər, hansısa kompüter, aparat onu göstərə bilmir. Əgər qucağında silahla kazarmada yatmamısansa, bunu dərk edə bilməzsən. 5 dil bilə bilərsən, amma yanında döyüş yoldaşının ölməsi ilə keçirilən psixoloji sarsıntını heç kəs bilə bilməz”.

Nazir Sahil Babayev isə cavabında bildirib ki, araşdırılmamış məlumatlar verilməsin:

“Zəfərimizdən sonra şəhid ailələrinə, müharibə əlillərinə verilən bütün təyinatlarla bağlı bukletlər, arayışlar təqdim olunub. Eyni zamanda Nazirliyin saytında “Zəfər sistemi” adlı bölmə yaradıldı. Orda hər kateqoriya üzrə hər şəhid ailəsinə, müharibə veterenanına düşən imtiyazlar elektron şəkildə öz əksini tapıb. 

Təqdim olunan heyvanlarla bağlı isə xahiş edirəm araşdırılmamış məlumatlar verilməsin. Təqdim olunan hər bir heyvan haqqında təqdim olunan gün videoçəkiliş aparılır. Onlar sayta yerləşdirilir. Qida Təhlükəsizlik Agentliyinin idxal sənədlərinin xəstəlik, sağlamlıq, baytarlığa dair bütün sertifkatları da orda olur”.