Son günlər yeni bəstələnən mahnıların sözləri və musiqisi tez-tez müzakirə olunur. Musiqilərin bayağı və ya hind, fars ritmləri üzərində olması tənqid edilir. Gənclər arasında geniş yayılan və sevilən musiqili meyxanaların sözlərinin isə insanlara pis vərdişlər aşılaması gündəmdən düşmür Son olaraq, “Kazbek” mahnısı narkotik vasitələri təbliğ etdiyi üçün rezonans doğurub.

Səsləndirilən tənqidi fikirlərdən sonra mahnının ifaçısı “Vüqar Səda” ləqəbli meyxanaçı Vüqar Abdullayev Sumqayıt Şəhər Polis İdarəsinin əməkdaşları tərəfindən saxlanılıb. Onun üzərində aparılmış şəxsi axtarış zamanı “Belamurkanal” papirosuna doldurulub və istifadə edilməsi üçün hazırlanmış marixuana aşkar edilib.

V.Abdullayev İnzibati Xətalar Məcəlləsinin 206-cı (Qanunsuz olaraq narkotik vasitələrin, psixotrop maddələrin istehlakı, satış məqsədi olmadan şəxsi istehlak miqdarında hazırlanması, əldə edilməsi, saxlanılması, daşınması və ya göndərilməsi) maddəsini pozmaqda ittiham edilib.
 

Bu gün isə Sumqayıt Şəhər Məhkəməsində Abdullayevin işinə baxılıb. Məhkəmə V.Abdullayevin 30 sutka müddətində inzibati qaydada həbs edilməsinə qərar verib.
Oxşar hadisə ötən ilin sonlarında Türkiyədə baş verib. “Mary Jane” adlı mahnının ifaçısı Burry Soprano narkotik maddələri təbliğ etməkdə ittiham olunaraq, həbs edilib. Çünki jarqon dilində “Mary Jane” narkotik maddələrə deyilir.



Uzun illər müğənnilər əsasən siyasi motivli mahnılara görə təzyiqlərə məruz qalıblar. Bəs, qanunvericilik nə deyir? Mahnı sözünə görə şair, müğənni həbs oluna bilərmi?

Hurriyyet.org məlumatına görə, Musavat.com mövzu ilə bağlı hüquqşünas Əlövsət Allahverdiyevin fikirlərini öyrənib. Hüquqşünas bildirib ki, insanlar qanunvericilikdə əməlinə görə məsuliyyət daşıyır: “Musiqiyə, sözə görə insanları məsuliyyətə cəlb etmirlər. Son günlər isə tənqid olunan mahnıda narkotikanın təbliğindən söhbət gedir. Bir tərəfdən biz orta məktəblərdə, ali təhsil müəssisələrində narkomaniyaya qarşı mübarizəni gücləndirir, maarifləndirmə işləri aparır, gənclərin narkotikdən uzaq olmasını təbliğ edirik. Digər tərəfdən isə narkotiki təbliğ edən mahnılar yayılır, narkotik vasitələr təbliğ olunur. Narkotikanın təbliği cəmiyyəti uçuruma aparır. Mahnıların sözləri, musiqisi qanunla qadağanı olunmayan fəaliyyəti əks etdirə bilər, burada hər hansı hüquqi məsuliyyətin yaranmasından söhbət gedə bilməz. Lakin həmin şəxslər həbs olunmasa da, onlara xəbərdarlıq edilə, fəaliyyətləri ilə bağlı tədbirlər görülə bilər. Əsasən, mahnı terrora, ayrı-seçkiliyə çağırış edərsə, bu zaman həmin mahnıları oxuyan şəxslər məsuliyyətə cəlb oluna bilər. Əxlaqa uyğun olmayan sözlərdən istifadə edən ifaçılar həbs olunmasa da, onlara xəbərdarlıq edilməlidir. “Kazbek” mahnısını oxuyan mahnının sözlərinə görə deyil, üzərindən narkotik maddə tapıldığı üçün saxlanılıb”.
Hüquqşünas əlavə edib ki, insanların əxlaqını pozan, onlara zərərli vərdişlər aşılayan mahnılar çoxalarsa, qanunvericilikdə bununla bağlı addımlar atılmalıdır: “Düşünürəm ki, bu cür mahnılar geniş vüsət alarsa, insanlara mənfi təsir edərsə, ənənələrimizə, mentaitetimizə əks olan addımlar atılarsa, bunun qarşısını almaq üçün hüquqi addımlar atıla bilər. Amma o addımlar hüquqi dəyərlərə zidd olmamıldır. Çünki biz beynəlxalq hüquq normalarını qəbul etmişik. Atdığımız addımlar bu normaları pozmamalıdır”.



Paylaş: